أم هبج
قال إدريس ود علي في البطانة:
دي بطانة أبعلي العند الشعور مفهومة
شرطاً للبدورها محنضلة ومسمومة
كم لله فيها مفقشين هام رومة
بالدم والرمم لا عند جزم موسومة
**
حسان وابعلي واب سن حدار الجار
كاتلين عز مكوك كم بردوها الدار
من الهايكوته لي البلد ابو قنا وصغار
ما خلوها نية تتقلب للنار
حليل اهلك حليل البردوك قبيل
دا هجين المقادير بي مرور الخيل
قبال التصاويت والبهادل ديل
ما شافو الاضافر في جوامع السيل
امثلة من شعر وصف البطانة وما فيها من نعم وامطار:
وقال الحاردلو في البطانة عندما تهطل الامطار وتتزين الارض وتنتعش الانعام والناس والطيور :
الشم خوخت بردن ليالي الحرة
والبراق برق من منه جاب القرة
شوف عيني الصغير بي جناحه كفت الفرة
تلقاها أم خدود الليلة مرقت برة
***
الخبر الأكيد قالوا البطانة اترشت
وسارية تبقبق با الصباح ما انفشت
هاج فحل أم صريصر والمنايح بشت
وبت أم ساق على حدب الجميل اتعشت
**
برق القبلة شال شالت معاه بروق
ختت له أم رويق عم السحاب من فوقو
العفرت رحل يبكي ويسوي القوق
والضحوي اتردف ليله ونهاره يسوق
***
البارح بشوف يشلع بريق النو
وحس رعاده يجرح في الضمير كوكو
داك طير القطا الدور مشارع الهو
وفرقان البطانة اتماسكت بالضو
***
وقال ود جماع البطحاني يخاطب البطانة:
الموت يا أم هبج صقاره تابع خيلك
الا كرمية ما بتجوعيه دخيلك
رب العزة بي وابل المطر ساخي لك
السحي والمغيريط والصغاري نخيلك
***
نعمك كس في الهبجة التناها مهيق
براقك بيقدح وهمبريبة يقيف
بهم ربلك مجدع يا الفضاك مو ضيق
علاوك مزرقن وشرفه نيله مزيق
***
وقال ود نابل البطحاني:
الموت يا أم هبج فيك بالكوار مو صدفة
وما ببنكر عليك يوم تفتحي لك ضلفة
مرية فيك بتطيق العمار الخلفه
مطروحة جناحك طرفه وطن حلفا
وقال شاعر آخر:
برقك قلع السارية أم سحاباً صاح
ونعالك سكت من الهواء اللحاح
رعدك رز في المطرة التقيلة وقاح
وبارك لاقي شمس الغيبة باكر زاح
وقال ود شوراني
نويت السفر قافيت بـطانة أم سـاق
وزري السيف وود أبصيده والبراق
بـعـد قـافينـا بـلـد الحــرق الـعـشـاق
مقيلنا قفه السمير إن هـون الخـلاق
ود شوراني
الضحوي اندفق كل الاراضي بسطه
رخى جناحو باهله اصفاحو دور ماوطه
بي قدره الاله كل حاجة لاقيه غرته
الا قلوبنا نحن المن فلانه مرضته
ودالشريقاوي:
فوق حدبه ملوك سحبا”مزرقن خطه
سيل السارية جدول ونار عشانا همته
ود دبلك نبت كسى من عريهو اتغته
مسعود ايدو فضت في القصيرة اسقته
العاقب ود بليله:
كل ماحي بيكبر الا البطانة صغيرة
وكل ماكب هطيل بجددولا حريرة
السارية التجود في المهاوي كريرة
رووس اللبلب اب كيعان مساهو ضريرة
اضف تعليقا