مسدار رفاعة
الشاعر:- احمد عوض الكريم ابوسن
رفاعه الربه قافاها …البليب طربان
ناطح المنو ميزان ….قلبي مو خربان
فوسيب السواقي البي اللدوب شربان
بلودو بعيده فوق في ..بادية العربان
&&&&&&&&&
&&&&&&&&&
رجال التاكا بي جاهن قواسيك هانت
مسك فجا عميق ..والبيدا ليك ادانت
علي الفي جيدا متبورالبراتي مبانت
المخلوفه ضجت من دويك وعانت
&&&&&&&&&
&&&&&&&&&
بلدات الكموقه ……..وحلت السراف
جاهن داوي ……دناي المسافات راف
يا الضيب العلي ……راس القلع هراف
لاهطك حر شيوم لوقراد ولاهوقراف
&&&&&&&&&&
&&&&&&&&&&&
عقب سيالو قد فوق الحليله بدينا
قصدو الليله.. في باكريتو يعدينا
علي بلد العلي.. سيدك مردم دينا
ارح يا القمري في باقي النهار ودينا
&&&&&&&&&
&&&&&&&&&
حفيرات السنط جيتن تعوم بي التنيه
ناطح الشمعدانه .. عديلة مي منحنية
درعات العفا الكبد…. العسين منتنيه
مي لافخاك يا تيس قنه بيك معتنيه
&&&&&&&&&&
&&&&&&&&&&
عقب ود موسي شرف امات رقاريق شفت
بعشوما سمع نقره ……… وقطعت اللفته
بعد دحن جرايدك ومن شقيقك خفت
واغل الاصدرت امر القضا والافتا
&&&&&&&&&
&&&&&&&&&
ايدين اب تبوب شقيت وعرهن خاتر
جيت لي ام عود تجمع في النقع ماك فاتر
الحافظ حضورك ولي غيابك ساتر
اسرع واغلو يا الجمام قفاك متماتر
&&&&&&&&
&&&&&&&&
ديك الشاقه بانت ومنها الحمريب
عوم بي الراحه اوعى تقطع الدريب
ود جمل الندم عنافي مو كهريب
ماهو بعيد عليك بلد ام حنانه قريب
&&&&&&&&
&&&&&&&&
خرت القدة شب فوق دبة الاساد
حسن شيخ طرقي ينجي التيس من الحساد
محمود الطبايع ……. لين الاجساد
جميلا بي الظرف فوق الندايد ساد
&&&&&&
&&&&&&
اجمع بعد شرف الحريحير طار
دانى بعيدو بي المصعي وجري الحار حار
علي جريعة البنوني ومسكة اب محار
لولح راسو واتمرعف بلا السحار
&&&&&&&
&&&&&&
سيتلو مقيلو بي الباكريه في الضقال
خد لي هجسه قم فاقد السحي الماقال
اليبس سراة السرعو ماهو تقال
لطيف قامه ادعج واكحل الامقال
&&&&&&&
&&&&&&&
طبق فور الصباح بعد النهار مابرد
فرد الحب ويقن لي النجيع اجرد
يا القمري العلي راس الغسينات غرد
وين المن زوال الحي سلولا ازرد
&&&&&&
&&&&&&
ود ابو قرمه واب قدوم جني الندام
شيشك برد السرج سقتو لا قدام
الخلاك جريدك في النقع خدام
خف بعد مني حر عشقو البقي لي مدام