من شعـر الهمباته
قطع وادي العشر تيس العُلو أب سيقان
قبــض السكة واتقيقم رمــى الفدان
نيتـو يماسـي حورية جنان رضـوان
عندهـا لينـا عظمة وشندقوقة وشان
سكران النقيب حكمت معانا الفتقه
ابرك يا سمع رعد ام عتيم الاتقة
علي دور الفلير دموره عاتق عتقه
جبدك للزمام نتيل رباب مو نتقه
هجين الجرحو فتقنُّو البروق بي دعاشن
طفّر منعقـــل عارفني ليه مخاشن
علي ست الجمال الحادق المو داشن
لوبع والجوالس رحّلن بي فراشهن
الضير اللسان سوط العنج مو قالسو
فات نص المسافة وسرجو فكّ جوالسو
ناطحبي الغرامو فؤادي حسسه مسالسو
نفسو عفيفة مو مداين السعوب ومخالسو
ود الحوري شاف قلع النواصل جرّف
السوط منّو زي عادي المحيرة اتغرّف
يا ود العنانيف أب قفاياً سرّف
وااااا سهرك على الـ لفسلْنا ما بتحرّف
بت اللا زمان نطحت فيافي وصي
يجادعن بالبغو قش البطانة الني
دغسات العيون الما بيرد الحي
لي ليمك شحد ربي ورفعت ايدي
وقال الجزولي ود سبوبة:
يوما بالصعيد فوق الكزازي موقي
ويوم قاعد معاهن وبدفع المتبقي
الخلا الخلوق متونسين في حقي
عارف ريد الفرو ماهو معقي
اضف تعليقا