مسدار لذكرى الحاردلو
شبّعنا الضيوف كرم الغيوم الماطرة
ما فرّ القليب مفزوع ولا من خاطرة
والموت القريب انفسنا ما بتتخاترا
تتوطا اب درق و تدوس اسود ا مخاطرة
*******
ما بنخاف سوى من ربك الديان
وشافعنا احتمل سوط العنج عريان
صوته زئير اسد لا كسرة في لا ليان
ووقت الحارة يقدل في الجمر حفيان
*******
مخير فينا سيد نفسو في اقطاعو
فارس الحوبة طايع امره من اتباعو
لا اتذلل و لا امر البينهر طاعو
فايت الطائي في كرمو وطويّل باعو
*******
ما بخاف الصدام لا يخشى نار في معارك
لو وقف اب درق في دربو ليه ما تارك
تخشاه الاسود تتحاشى ليه مسالك
في عينه الشرر زي الشهاب في الحالك
تعال يا مفتخر نوريك حال جنياتنا
لا ظاهرنا بيخالف كمان نياتنا
بتخاف النسور وصقور هي من فراتنا
ويتمنى المحل زي الخريف جيّاتنا
*******
جبارين كسور الامة اسياد مسعى
وكان لرضيعنا بيعادل فوارس تسعة
ان بلغ الفطام اضرب في مية وتسعة
وان اصبح رجل الاحصاء ما بتسعه
*******
لا بتلاوى لو قاوى الحديد بيسايرو
لو شق الصفوف زي الورق يتطايرو
لا جبخانة تثني عزيمتو ولا زخايرو
لو اشّر تطيعو الدنيا تدو الدايرو
*******
وزي حاردلو ما قال من بيوت مو مشاترة
حمريبن طلق كبريت عروسا عاطرة
محل قبل تجيه افراح القبل متقاطرة
والعافية التقول كل الخليقة دكاترة
*******
( قليعات الرزق أمست تعولن ماطرة
حمريبن طلق ريحة الفلير والباترة
أكان جيتن فوق أم محاجما قاطرة
تلقى العافية من غير بنسلين ودكاترة )
ملاحظة : الابيات الاخيرة للحاردلو وما قبلها لكاتب هذه السطور
اما بعد فالى المسدار التحفة الذي قل ان يجود بمثله الزمان لشاعرنا الهمام محمد عوض الكريم ابوسن (الحاردلو )
قليعات الرزق أمست تعولن ماطرة
حمريبن طلق ريحة الفلير والباترة
أكان جيتن فوق أم محاجما قاطرة
تلقى العافية من غير بنسلين ودكاترة
***********
الليل والنهار واحد علي العميان
واللوم والشكر واحد علي السجمان
عز الرأس دهن وعز القرب قطران
عز الخيل لجم وعز الحريم وليان
*********
إن مال الشجر ما بتكسرن فراعـو
وقمحان الطلب للمابجيبلو ضراعو
ليه يا أهلنا للبيناتنا ما بتراعـو
الزول رأسو موجعو وتربطولو كراعـو
*********
خبك مو مشيك الليلة مالك؟
تتقل بي اليمين وتجر شمالك
بنيتا لي شيوما مشني حالك
رقادا دونا قط لا تسيهو بالك
*********
تعال يا شيخ النريك صفاتنا
ما عاشرنا زولا ضاق عسلنا وفاتنا
نحن رجال عمل نحن الخشن كفاتنا
نحن وفانا للعاشرنا حده وفاتنا
*********
ضراع المسافات والواطة المتسعة
عينو في الكرباج ويابي اللسعة
ابيض ليهو زنقدة يعوم بالنسعة
طيار السعودي قام من البلد يوم تسعة
*********
يمشي ام تتالي الليلة باروو وزايرو
اتخنتل متل زرع الذرة الفي جزايرو
نهداً دابوا قام عراوي زرايرو
قال للناس تراهو الموت بشيل الدايرو
اضف تعليقا