بابكر محمد عوض الكريم ابوسن يمدح أهل البطانة:
أهلي اللي العشير حلوين وخيرهن وافي
بلموا التالي بي رأفة وحنانا دافي
أهل أب غرة والنقارة والعنافي
سيفن بشلع الفارس محل مايوافي
ديل فرسان لقا اليوم الدواس يوم عيدن
وديل أتأكد العدمان بترفعوا إيدن
كان جيتن غريب في فت نهار بتريدن
ديل في الجوده مابقدر أعدو رصيدن
ديل المنهن فيض المحنة بياتي
وصبارين على المحن البجن يوماتي
أهل تاريخ وخيلا في البطانة عواتي
حالا بضرعوا الزول البجيهن خاتي
ديل العندهن سية العشير مغفورة
وديل أهل الجبارة السمعتن مشكورة
ديل أهل البطانة الشامة في المعمورة
سابع أرض وبي الامجاد بنوها قصوره
ديل والله مابتنعد كتيرة سماتن
وديل إن جوك مابتعرف الغريب بيناتن
ديل الديمة تنطح في السماك هاماتن
وديل الطيعن عاصي الخصيم سلاحتن
اضف تعليقا